Vik Ørsta har levert rekkverk til heile Europa, i alle moglege design, vinklar og kurver. For å vere sikker på at rekkverket blir monterer slik det er godkjent og testa for, er det nokre ting du bør passe på allereie før du støyper ned boltegruppene. Vi har tatt praten med salsingeniør Sondre Aakre og samla tipsa her.
Lag eit godt bestillingsunderlag
– Det aller viktigaste for å få det rekkverket som passar til ditt prosjekt, er gode forklaringar og eit godt underlag til bestillinga, fortel Aakre. Nye prosjekt har ofte felles detaljerte teikningar og modellar for rekkverk og kantbjelke, men dette treng vi også på rehabiliteringsprosjekt. Vi må vite korleis kantdragaren er, kva vinkel og lengde det er på kurvene, korleis stigninga er og korleis avslutningane eller overgangane er tenkt. I tillegg spelar overgangsrekkverket eller avslutninga inn på prosjekteringa.
Aakre understrekar at dersom det er spørsmål eller manglande underlag, er det viktig at dette blir avklart og korrigert før produksjonen startar. Dess mindre uklare moment, dess mindre rom for tolking som kan føre til feil.
Innmålte punkt, boltegruppe– plassering, geometri og endeavslutningar vil Vik Ørsta gjerne ha i form av ei KOF-fil eller i ei Excel-fil med x, y, z-koordinatar. I tillegg er det ofte mykje god informasjon i bileter frå ulike vinklar og ulike avstandar.
Bestem type rekkverk
Statens Vegvesen si N101 Trafikksikkert sideterreng og vegsikringsutstyr seier at det for rekkverk på bru og støttemur skal vere 50 mm ±30 mm mellom fronten av rekkverket sitt føringselement og kanten av kantdragaren. Denne avstanden legg til rette for mellom anna snøbrøyting utan å skade rekkverket og er standard i Norge. Men sidan det er ulik breidde og design på rekkverka, må boltegruppene settast ned ulikt.
– Eit problem som kan oppstå er at ein ikkje har valt type rekkverk før ein set ned boltegruppa, eller at det blir endra etter at ein har støypt ned boltegruppa, forklarar Aakre. Sjølv om det er standard stolpeavstand for brurekkverk i Noreg på 2000 mm, er det ulik plassering av boltegruppene i tverretninga, noko som resulterer i ulik nedstøyping ut i frå kva rekkverk ein har valt.
Dette viser godt når ein samanliknar Sicuro Brurekkverk, som har det slankaste designet, med Vik SVV-2 som har det breiaste designet. Sicuro skal settast ned berre 193 mm frå framkanten, medan Vik SVV-2 må ha heile 361 mm avstand frå framkanten. Ved å følgje instruksjonane på det aktuelle rekkverket du skal bruke, unngår du situasjonen der rekkverket ikkje passar, og boltegruppene må støypast ned på nytt. Alle detaljar finn du på produktsidene til rekkverka våre.
Ta omsyn til
– Å støype ned boltegrupper i hjørne og knekkar bør ein unngå, seier Aakre. Dette kompliserer og fordyrar rekkverket. Støyp heller ned boltegruppa minst 300 mm frå knekken, målt frå senter boltegruppe til knekk, så kan du bruke standard komponentar.
I tillegg er Vik Ørsta sine element laga med c/c 2000 mm, uavhengig av stigning eller kurve. Det vil seie at du må ta omsyn til stigninga (z-koordinaten) når du skal finne avstanden mellom boltegruppene. Det enklaste er å legge målbandet langs kantdragaren og merke av for kvar 2 m. Bruk helst eit lengre måleband, så unngår du følgefeil som kan oppstå ved å bruke ein kort meterstokk.
– Skulle uhellet vere ute, så kan det meste ordnast på ein eller annan måte, avsluttar Aakre. Likevel er det mykje å hente på god innsats i starten for å sikre ei vellukka levering og montering.
